O le tausaga e 2011 na amata faatino ai lenei polokalame i tua i nuu ma afioaga ina ia tapena ma saunia ai uma tagata lautele i taimi e lofia ai le atunuu i faalavelave faalenatura ma matuia.
O Tufulele o se tasi nei o afioaga ua mae’a faatino ai le polokalame lenei na faagasolo mo le 4 aso.
O lenei polokalame o loo taimua ai le Malo o Samoa e tauala atu i le Matagaluega o le Siosiomaga faatasi ai ma le ADRA Samoa ma nisi o vaega tuma’oti ma Matagaluega a le Malo ina ia mafai ona faataunuu lenei faamoemoe i afioaga o le atunuu.
Ta’ua e le Faauluuluga o le poloketi lenei mai le ADRA Samoa, Afioga Tologataua Moimoi Tauave i se pepa o faamatalaga, o le unaia foi o lenei faatinoga ina ia nofouta ai le mamalu o le atunuu i tiute ma matafaioi e faatino i taimi o faalavelave faalenatura.
“Ia mautinoa lava o loo malamalama le atunuu i vaega e faatino, o nofoaga e ao ina sulu iai aemaise o faailoilo e iloa ai o se faalavelave.
“O le auga lava ia siitia le tulaga o le saunia ma tapena lelei o o tatou tagata i vaega faapea aemaise o le galulue faatasi e le gata o le nuu ae o tatou Matagaluega o loo gafa ma tiute i taimi o faalavelave.
“E pei ona silafia le tulaga sa iai le atunuu o le tsunami i le 2009 na matuai telē lava le aafiaga o tatou tagata ma o le tāua tonu lava lena o lenei polokalame o loo taumafai ai.”
O le 4 aso na faatino ai lenei gaioiga e ala lea i le aoaoina o i latou na auai ia vaevaeina lelei kulupu e nafa ma nei galuega laveai aemaise o le faataitai lea o masini faailoilo e faaaogāina i taimi o faalavelave faalenatura.
E silia ma le 90 sui auai mai le afioaga na feagai ma lenei polokalame e aofia ai matai, tina, tupulaga talavou o le malosi o le nuu ma fanau.
O le polokalame lenei o se tasi lea o vaega pito sili ona tāua i lalo o le poloketi ua ta’ua Mau i le Too lea o loo faatupeina e le Malo o Amerika lea o loo nafa ma le A.D.R.A. Samoa i lona faatinoina.
