I le taunuu mai ai o le faigamalaga a Samoa i le amataga o le masina faai’u o lenei tausaga, o se vaitau tāua lenei i lo tatou atunuu e tulimata’i ai aso fiafia o le Kerisimasi ma le Tausaga fou, e maua ai taimi e mālōlō ai ma malaga e asiasi i aiga o aumau ma nonofo i isi atunuu, poo totonu lava foi o Samoa.
O se tala fiafia mo le au faigaluega uma a le tatou malo o le a faaumiumi mālōlōga mo i latou mai lava i le faamanatuina o le Kerisimasi se ia oo ina taunuu i le faafeiloaiina o le Tausaga fou 2026.
E lua vaiaso o le a mālōlō ai i latou amata i le aso 29 o Tesema seia oo ina toe amatalia galuega a le malo i le aso 12 o Ianuari. Ua faailoa lea faai’uga a le Kapeneta e le ta’ita’i o le malo,le afioga i le Palemia ma le faamoemoe e lē taofia ai galuega ma auaunaga masani e manaomia pea e le atunuu i aso uma e pei o le tautua a le Matagaluega o le Soifua Mālōlōina i fomai ma tausi soifua, o le auaunaga a le Matagaluega o Leoleo, Falepuipui ma le Toe Fuataina, faapea le tautua a le vaega o le tineimu ma galuega laveai i taimi o faalavelave tutupu faafuasei, ma i latou o galulue i le tautuaina o malaga a vaa o le malo i le va o motu o le atunuu.
E faapena foi ona fa’aauau galuega a le vaega o iai le vaaia o le eletise ma le suavai. O aso mālōlō mo tagata faigaluega a le malo e le aofia ai tagata faigaluega o tautua i le vaega tumaoti i pisinisi ma kamupani.
