O le masina amata lenei o le tausaga fou 2026 sa faaauau ai pea galuega a leoleo o le osofa’i o nofoaga o loo faagaioi ai solitulafono tau fuālaau faasāina, ma o le aso 12 o Ianuari e oo mai i le aso 27 o le masina lenei le Aso Lua lea o lenei vaiaso, e valu osofa’iga poo drug raids na faia ai.
Na manuia uma ia sa’iliga e pei ona faailoa e le sui komesina o leoleo, falepuipui ma le toe fuata’ina ma sa maua ai laau faasāina o le maruana, o paipa e ula ai le pauta faasāina o le ‘aisa, o ututau ma laaumalosi, faapea ma tupe e silia ma le valu afe tālā lea e aofia ai ma tupe Amerika ma Ausetalia.
O ia osofa’iga e valu a leoleo ua molia ma taofia ai le 37 o tagata e aofia ai alii ma tama’ita’i.
Ua faaopoopo atu lea aofa’iga i le isi 70 ma ona tupu na molia mai i le taimi o le kelisimasi ma le tausaga fou i moliaga tau fuālaau faasāina ma o loo taofia uma i le falepuipui i Tanumalala.
O le masina fou o Fepuari e tutula’i ai i le faamasinoga.
Faaalia e Leiataualesa Samuelu Afamasaga le Sui Komesina o le Matāgaluega o Leoleo, Falepuipui ma le Toe Fuata’ina, o osofa’iga sa faatino e iai lava nisi sa faaoo atu ai faaseā i le matāgaluega.
