O le vaiaso nei o loo usuia ai le fono faaletausaga masani a Malo Aufaatasi i le nofoaga tutonu o lea faalapotopotoga tele o malo o le lalolagi o loo i le aai o Niu Ioka i Amerika, e pei ona auai le ta’ita’i o le tatou Malo ma lana usugafono.
O le faai’uga o lena vaiaso ua alu atu sa palotaina ai le finagalo o Malo Aufaatasi i sana faai’uga ua momoli ai le avea’i i ta’ita’i o le Malo o Isaraelu, ina ia solomuli ese ma le nofoaga o tagata Palesitina o loo tula’i mai ai ana osofa’iga, ma ia taofia loa ma le taua.
O le sailia o finagalo o atunuu i le lagolago pe tetee i lea finagalo o Malo Aufaatasi, e lei palota Samoa ma isi malo e 42.
E lē o iloa le mafuaaga o le lē tuuina atu o se finagalo o Samoa e ala i le palotaina o lea faai’uga a Malo Aufaatasi, ae o atunuu i le Pasefika sa lē faia se latou palota pe abstain, o Ausetalia, Kilipati ma Vanuatu.
Sa palota tetee atunuu e fitu o le Pasefika e aofia ai Tonga, Tuvalu, Palau, Papua Niu Kini, Nauru, Fiti, ma le FSM poo le Federated States of Micronesia.
E 124 atunuu na palota lagolago ina ia taofia loa le taua ma osofa’iga a Isaraelu e aofia ai atunuu e lua o le Pasefika o Solomona ma le Atu Malesala poo le Marshall islands.
O Samoa e pei ona silafia, ua osia lana faigapaaga faavaomalo ma le atunuu o Isaraelu e pei o se tasi o maliega ua osia i le va o Malo e lua o le tatala o le malaga atu o o tatou tagata i lea atunuu e aunoa ma ni visa.
