O ē o loo iai lagona e pei o le faalapotopotoga e gafa ma le vaaia o le puipuia lelei o meaola i Samoa, ua tatau ona tapu ma faasā loa ona toe faaulufale i le atunuu le vailaau oona fanavao o le paraquat, e leai ni a latou faamaumauga e avea ma ni mau malosi e lagolago ai le tapu loa o lea vailaau oona.
O se tasi lea o vaega o tali mai le matagaluega o faatoaga ma faiga faiva e faamatala ai i ē o fia silafia le tulaga o loo iai taumafaiga a le matagaluega e siitia le tulaga malupuipuia o le faaaogāina e le au fai faatoaga o le vailaau fanavao o le paraquat.
E iai se atugaluga ma se popolega o le asosi o loo puipuia meaola i Samoa i le onanā ma mamate o taifau a nisi aiga ona o le vailaau e mafua pe a uma ona fanaina i le paraquat.
Peitai ua faailoa e le matagaluega i se pepa o faamatalaga faalauiloa, e leai ni mau ma ni faamaumauga a lea asosi e faamautu ai lea tulaga.
O le tapu ma taofia loa o le toe faaaogāina o lea vailaau fanavao o se mataupu ua faaalia e le matagaluega o faatoaga ma faiga faiva, e lē vave ona maua iai se tali ona e iai pea iloiloga e tatau ona faatino, aemaise o aiaiga o maliega ma feagaiga faavaomalo tau vailaau faaopoopo iai ma manaomiaga faaletulafono.
