O le polokalame o galuega faavaitaimi ua matala ai le faitoto’a mo nisi tagata e tuua ai le atunuu ae o loo iai o latou moliaga solitulafono o loo i luma o le faamasinoga.
O le tausaga e 2020 na iai se mataupu faapea na mafai ai ona tuua e se taulealea le atunuu mo ia galuega ae o loo iai sona moliaga i luma o le faamasinoga.
Sa ia faaaogā le pepafanau o lona uso e maua ai lona tusifolau ma alu ai i le igoa o le isi tagata, ae na maua lava ina ua toe taliu mai i le atunuu ma tulai i le faamasinoga.
O se tagata foi na alu i galuega faavaitaimi i le tausaga nei ae o loo iai lona moliaga o le faiaiga fai faamalosi i luma o le faamasinoga.
Ua faailoa i se lipoti na alu ese ma le atunuu lea tagata e aunoa ma le iloa e i latou o loo feagai ma le faia o feutanaiga o ia galuega e iai se solitulafono o loo tuuaia ai lea tagata.
O nei mataupu sa oo i le faamasinoga ma iloa ai ia tulaga o loo faailoa ai e lei talosagaina e leoleo se taofiga faaletulafono poo se prohibition order, e lē mafai ai e ia tagata ona tuua le atunuu.
O le amataga o le masina nei na valaau ai le moliaga o le faiaiga fai faamalosi ma lona afafine faaletulafono poo le step-daugter o se tamā talavou ua alu ese ma Samoa ona o galuega faavaitaimi ae ua lē nofo e tali i le solitulafono ua tuuaia ai.
O tagata uma e malaga mo ia galuega e tapa lipoti mai le falemai mo le soifua maloloina faapea lipoti mai leoleo e iloa ai poo iai pe leai foi ni ona moliaga faasolitulafono.
