O le faaiuga o le vaiaso talu ai nei na faalauiloa mai ai e le auaunaga a leoleo ma le ofisa o tiute a Niu Sila e ala i se faasalalauga faalauaitele i upega tafāilagi le taunuuga o se tasi o a latou galuega tele, faasino tonu lea i gaioiga solitulafono ‘au’au faatasi i le aumai faananā ai o fuala’au faasāina i totonu o Aotearoa nei tauala mai i le malae vaalele faavaomalo o Aukilani; o i latou ua tā’ua le drug-smuggling syndicate.
Ma i lea galuega tele na faailo ai le lata i le 200 o moliaga ua tuufaatasi e leoleo.
I tulaga o lenei mataupu, e faapea, e 20 pepa faataga- poo search warrants na faatino ai osofa’iga ma sa’ili’iliga a leoleo i le tele o faaitu o Aukilani, ma o lea na o latou pu’e faapagota ai o ni tagata e to’a valu (8) o ē iai sootaga i le vaega ua tā’ua o le Brotherhood 28 MC, e aofia ai ma le peresitene o le vaega poo gang.
O loo tu’ua’ia le aumai faananā ai e lea kulupu o fuala’au faasāina o loo faatulaga i lalo o fuala’a faasāina mata’utia, ma mātuiā ona aafiaga – o class-A drugs. Faamauina na o latou fa’aaogaina ni ‘atopa’u e aumai i luga o vaalele.
E māua o metotia a i latou nei e faafoliga e leai se tasi e ana ina lenei atopa’u poo se isi foi na alu atu ma ia i luga o le vaalele (unattended baggages)
I faamaumauga i le pu’e faapagota ai o ē ua aafia i le tulafono, e 170 lelei moliaga ua molia uma ai i latou.
E aofia ai moliaga o le aumai i totonu o le atunuu o fuala’au faasāina o le methamphetamine ma le cocaine; taupulepulega e aumai ma tufatufaina atu i tua o pauta faasāina nei ma le tele o gaioiga i le faaoga ai o tupe palapalā.
E $50,000 le tupe na maua ma taofia e leoleo, o ututau, o meatotino anagatā faapea ma maisini eletoroni- electronic devices.
Faailo e leoleo o le tasi o vaega o le galuega tele a le auaunaga o le Operation Matata, ma ua oo ai nei le numera o tagata ua taofia ma ua pu’e faapagota i le 43. Ua maua ai ma taofia le oo atu i le 630 kilokalama o le methamphetamine, ma le 112 kilokalama o le cocaine; ae ua oo atu i le $800,000 tino i tupe ua taofia mai lava i le amataga o lenei galuega tele.
Tā’ua e leoleo, o le agaga fiafia, ua mafai e ala i lea galuega ona maua le tele o gaioiga a i latou nei o syndicates, amata mai lava i o latou sootaga ma ē o loo galulue i totonu o le malae vaalele o baggage handlers seia oo lava ia i latou o loo maualuga i galuega i le malae vaalele.
Puna o Faamatalaga: https://www.facebook.com/share/p/1KE3xYNF3G/
