O le saoasaoa o le ulufale mai i le atunuu ma le faaaogāina o le fuālaau faasāina o le ‘aisa, e lē gata ina osofa’i e leoleo nofoaga i fale i nuu ma afio’aga, ae ua oo lava i le nofoaga o faagaioia ai nisi o pisinisi laiti i le taulaga ua faatino ai lea galuega.
A itiiti mai e to’asefulufā tagata ua lipotia na pu’eina i le osofa’iga a leoleo i le maketi o i’a i Savalalo i le aoauli o le Aso Tofi o lenei vaiaso.
Na maua ai le fuālaau faasāina o le ‘aisa ma le maruana o loo tulei ma faatau atu e nisi o pisinisi laiti o loo faagaioia e lata i le maketi o i’a.
Ae o le lē solomuli o leoleo i le sa’ilia o nofoaga o loo faagaioi ai i ni faiga solitulafono fuālaau faasāina ua aumai ai ma se lapata’iga a le Minisita o le matāgaluega o leoleo falepuipui ma le toe fuata’ina ia i latou o faagaioia pisinisi o taavale laiti la’upasese poo taxi stands.
Ua faailoa e le Palemia o le Minisita foi o lea matāgaluega ua oo atu ia te ia faamaumauga a leoleo ua faailoa ai le tele o taavale laiti o loo masalomia i le faatauina atu o fuālaau faasāina.
O le lapata’iga a le Minisita ua tatau nei loa ona taofi ia gaioiga auā a maua ma faamaonia, e mafai ona se’i ai le laisene o le pisinisi taavale la’upasese.
