O le afiafi o le Aso Faraile o le vaiaso na te’a nei, na tuuina mai ai e le Matagaluega o Pisinisi Alamanuia ma Leipa (MCIL) se faasilasilaga faalauaitele, e faatatau lea i ni faaseā a le mamalu o le atunuu i luga o upega tafailagi e faatatau i siitaga faafuase’i o tau o oloa ua uma ona faatulagaina e le Poloaiga Faatonutonu o Tau o Oloa 2023 (01) aemaise mo oloa o loo faapea ona sioki i le taimi nei.
Na faaalia le fautuaina malosi e le Matagaluega o Pisinisi, Alamanuia ma Leipa faioloa uma, faioloa siiatoa ma faioloa taitasi o loo faatauina oloa mo le atunuu lautele ina ia taofia nei faiga lē talafeagai, o le siitia o tau o oloa poo le faatauina o oloa i tau maualuluga e mafua mai ona o le sioki o nei oloa.
Na fautuaina malosi faipisinisi nei ina ia usitaia tau o oloa o loo faatulagaina i le Poloaiga Faatonutonu o Tau o Oloa.
Ma na o latou faaalia, o se solitulafono le faatauina o oloa i ni tau maualuluga, e ese mai i tau o loo faatulagaina i le Poloaiga Faatonutonu o Tau o Oloa.
Ua fautuaina malosi foi aufaioloa uma o loo faamalosia i lalo o le Tulafono ina ia faailoa pe faapipii le Poloaiga Faatonutonu o Oloa i se nofoaga malu ina ia faigofie ona silafia e tagata faatau tau o oloa.
