Na amata le fono uso a le Palemene i le taeao nei i se faamanatu a le Fofoga Fetalai i sui faipule uma aemaise o sui faipule o le Ituagai e agai lea ini faamatalaga amuamu na faia agai i le tala o le tupe a le faigamalo fou lea na pasia i le Aso Lulu o le vaiaso na tea nei.
Taua e le afioga i le Fofoga Fetalai Papalii Li’o Taeu Masepau o le tiute lava o le nofoa o le faamanatu i sui mamalu uma le tulaga sagatonu o le galuega aemaise o le tausiga o tulaga mamalu ma le aloaia a le fono aoao faitulafono.
O nei lafoga na taua e Papalii “Ua molimauina e le nofoa i ala o faasalalauga ni uiga faaamuamu o le ituagai i le faagasologa o le talanoaina o le tala o le tupe na pasia i le Aso Lulu na se’i mavae atu nei, ua oo lava i le taitai o le Ituagai ua Ia faasalalauina faalauaitele faapea e le’i fia fesili i le tala o le tupe ae na mafua ona fesili ona o le ula i le vaivai tele”.
Ona o nei faasalalauga ua manatu ai le Fofoga Fetalai ua tatau ona oo iai se upu o le nofoa “E ui o fafo atu o le maota lenei na lafo ai nei saunoaga peitai ua faaaoga felafolafoaiga aloaia a le maota e faamasinoina ai le aano o lafoga sa fai, e ao ina o’u puipui i le tauoloa o le Palemene o le atunuu”.
O le faamanatu a Papalii I sui mamalu o le Palemene na Ia faapea ai e lē tau omai le atunuu e faamamalu le Palemene, ae o sui lava o le fono e faamamalua le Palemene “ O tatou tu ma aga ma faatinoga tatou te sufi ma faatino e tauoloa ai o tatou tōfiga, o Ia ituaiga lafoga ua atagia ai le lē faaaloalo ma le lē amanaia o lea itu o le tatou maota e le gata o le paia o le Pulega faatonu ae o sui mamalu o isi itumalo o
le atunuu na filifili mai e o latou itumalo”.
O ni saunoaga na faaali ai le faanoanoa tele o le Fofoga Fetalai i le taitai o le Ituagai ona o le lē faaaloalo i isi sui mamalu o le Palemene ma uiga faaamuamu i le tala o le tupe, o le manatu a Papalii o uiga ia e le maua ai se nonofo filemu ma se maopopoga o le Palemene.
