Ua faamaonia ua maliu le alii pese lauiloa o Jimmy Cliff, e pei ona faamaonia e lona faletua i le aufaasalalau i le vaiaso nei.
O Jimmy Cliff, le alii pese mai Jamaica o lona suafa na soifua ane ma ia o James Chambers ma ua faailoa o le faato’ā 14 o ona tausaga na ia tusia ai lana ulua’i pese ma mulimuli ai galulue faatasi ma isi tama pepese lauiloa e pei o Bob Marley ma isi.
E fiafia i le musika reggae, o musika tu’itu’i e pei ona faasamoa ai e nisi.
Sa avea foi ma tagata fai ata tifaga i le 1972 ma manumālōina foi faailoga tau musika, Grammy Award i le 2012 aemaise faailoga taualoa mai le malo o Jamaica ma faaulufale aloa’ia foi lona suafa i le Rock and Roll Hall of Fame i le 2010.
E tele pese ma taleni a Cliff ua lauiloa ai ma e maliu nei ua 81 tausaga o lona soifua.
O loo lipotia e le leitio faavaomalo a Niu Sila sa aafia le alii pese i le pneumonia ma isi aafiaga tau le soifua mālōlōina.
Puna o Faamatalaga: https://www.rnz.co.nz/news/world/579881/jimmy-cliff-reggae-music-pioneer-dies-at-81
