Ua lapata’i ane le ta’ita’i o Iran e faapea o soo se ituaiga osofa’iga mai ia Amerika e ono tula’i mai ai se taua faaitulagi i le faaitu lea o Sasa’e Tutotonu.
E lē o mailoa lava i le matāupu lea pe o le a faaaogā e Trump le malosi’aga faamiliteli a lona atunuu ia Iran ae o loo faaauau pea ona ia una’ia Iran ia aga’i ane e talanoa e faatatau i matāupu o loo aofia ai lona atunuu aemaise o le nofoaga niukilia lea foi e finagalo Trump ua tatau lava ona faalēaogāina.
O le ta’ita’i o iai nei o Iran o Ayatollah Khamenei na ia faauigaina foi solo tetee sa tula’i mai i le atunuu o se faato’ilaloina o le faigāmalo ma ia faamalosia atili le tali atu a le faigāmalo i ia gaioiga.
I se saunoaga a Khamenei na faia i se nofoaga i Tehran na ia saunoa ai a o feagai ai le atunuu ma le faamanatuina o le Islamic Revolution talu mai le 1979, na te manatu o loo naunau ane Amerika i lo latou atunuu ona o le suāuu, kesi ma isi minerale.
Na ia faailoa la e latou te lē fuafuaina ni osofa’iga i se atunuu peita’i afai e mana’o tele se tasi ma mana’o e osofa’ia lo latou atunuu, o le a lē tuumāmāina la e Iran lea tulaga.
Puna o Faamatalaga: https://www.bbc.com/news/articles/cx20z5nv9jxo
