Ua iai le fuafuaga a le malo e tatau ona oo atu i le aso 23 o le masina fou lenei o Tesema, ua mautū le filifiliga o ta’ita’ifono mo Fono Faavae a itumalo faapalota e 51, i le faamoemoe e faamautū ai ma tagata faigaluega e to’alima o ofisa o Fono Faavae.
O lea iloiloga ua faia e se Komiti filifilia a le malo e to’alima ona sui, ma o le latou galuega o loo iai le naunautaiga o le Palemia ma le faigamalo e tatau ona toe tatala ma amata galuega uma a ofisa o Fono Faavae i le aso 12 o Ianuari o le tausaga fou 2026.
O le feiloa’iga masani a le Palemia ma tusitala na fa’ailoa ai lea fuafuaga ma le faamoemoe o le malo ia toe a’e galuega i le mae’a o aso fiafia o le Kerismasi ma le Tausaga Fou ua tatala ai ma galuega o atina’e a itumalo faapalota o le atunuu.
O loo iai vaegatupe a nisi o Fono Faavae e le’i faamatu’uina iai mai le taimi na sauni ai le atunuu i lana faigapalota tele ua mae’a, ae o itumalo faapalota uma e 51 ua pasia i le tala autu o le tupe mo le valu masina o loo totoe o le tausaga faaletupe 2025 i le 2026 le tai miliona valu selau afe tala mo galuega o a latou atina’e ua fuafua e faaaoga iai ia vaega tupe o le poloketi tasi le miliona tālā.
