Ua iai nei le finagalo o le faamasinoga o palota o le a faaaogā mau tauto tusitusia poo affidavits a molimau e to’alua o le tagi tau palota mai Falealili 1.
O molimau ia e to’alua sa sa’ilia i se tusi saisai ae e le’i maua e oo mai i le taimi nei.
O molimau foi ia e to’alua o se ulugalii ua iai le poloa’iga a le faamasinoga ua tapu ai ona tuua Samoa mo ni malaga i atunuu i fafo.
O lea faai’uga na faailoa i le Aso Faraile na te’a nei ina ua mae’a tuuina atu nisi o folasaga mai le loia a le faipule o Falealili 1 le afioga i le Sui Palemia le afioga Toelupe Maoiautele Poumulinuku Onesemo o loo molia i tuua’iga o faiga faaālatua o faatosina i le palota tele ia Aokuso o le tausaga ua mavae.
Ua tuu avanoa ai le faamasinoga i le loia a le faipule ina ia tuuina atu ni molimau e tali i mau faatauto tusitusia pe a finagalo iai.
O le Aso Faraile o le vaiaso nei le aso 27 o Fepuari ua faatulaga e toe faaauau ai su’esu’ega o le tagi tau palota, ae o le Aso Lua o le vaiaso lava lenei e tatau ai ona faailoa atu i le faamasinoga e le loia a le itu o loo faasaga iai moliaga o le tagi tau palota pe iai ni molimau e valaau.
E silia i le 60 molimau a le itu tagi sa tapena mo le lagolagoina o le tagi peita’i e na o le to’atasi le molimau na oo atu i le aso na faatulaga e su’esu’e ai moliaga.
