A o faasolo ai fonotaga lona 53 a Ta’ita’i o Malo o le Pasefika i lenei vaiaso, ua folasia nei i luma o laulauafono a ta’ita’i se lipoti, o faamaumauga i tulaga o loo iai le siisii pea o le suāsami poo le sea level rise i atumotu o le Pasefika ma aai poo atunuu o loo faatulaga i lalo o le vaega ua ta’ua o le G20.
O lenei lipoti na folasia lea e le Failautusi Aoao o Malo Aufaatasi, le susuga Antonio Guterres ma le Faalapotopotoga o Vaaitau o le Lalolagi, le World Meteorological Organisation (WMO).
O loo faamatalatala ai le telē o popolega i le vavevave o le siitia o le maualuga o le suāsami, faapea aafiaga tugā o loo feagai ma le tele o atunuu aemaise lava atumotu laiti o le Pasefika.
I lea lipoti, o loo faaalia ai, ua faaluaina le maualuga ua siitia ai le suāsami i le 10 tausaga talu ai, e faapea e 0.2 senitimita le maualuga na siitia ai i le tausaga mai le va o le tausaga 1993 ma le 2002; a o lenei ua oo atu i le 0.48 senitimita le maualuga i le tausaga mai le va o le tausaga 2014 ma le tausaga 2023.
O loo faamauina o le 90% o tagata Pasefika e nonofo latalata i gataifale.
Mo le lalolagi e faapea, mai le tausaga 1993 aga’i i le tausaga na se’i mavae atu nei 2023, o le suiga i le siitia o le suāsami e 9.4 senitimita ma i nisi o nofoaga i le itu Saute i Sisifo o le Pasefika na silia atu ma le 15 senitimita le maualuga.
I totonu lava ia i atumotu o Solomona ma Vanuatu o le 60% o ona tagatanuu e nonofo latalata ane i le gataifale e tusa lea ma le 1 kilomita le mamao.
O nisi o vaega na folasia i lea lipoti o le tulaga o aafiaga o kasa oona ua tele ina aafia ai le siosiomaga, e pei ona faamauina o atumotu o le Pasefika e oo atu i le 0.2 le pasene e fesoasoani atu i le aofa’iga atoa o kasa oona lea e aafia ai le lalolagi, o se pasene aupito i maualalo lava lea; ae peitai o atumotu laiti o le Pasefika e aupito i sili lea ona aafia i suiga ogaoga o loo fetaia’i nei.
Ma o faamaumauga nei na faamanatu ai e le Failautusi Aoao o Malo Aufaatasi ia Antonio Guterres maliega ma tuugatala a malo eseese na faaleo i le fonotaga a malo na fai mo suiga o le tau le COP28.
Na ta’ua e le alii o Guterres e tatau i ta’ita’i o atunuu ona tula’i mai e puipui ona tagatanuu mai aafiaga tetele.
Na faaopoopo le sui o le UN a lē galulue e taofi le siitia o kasa oona, e lē mafai ona faasaoina le oo atu i le 1.5 miliona o soifua.
O loo faagasolo lenei fonotaga tāua i le malo o Tonga i lenei vaiaso, ma o loo auai atu ai foi le ta’ita’i o le atunuu, le afioga ia Fiame Dr Naomi Mataafa auā foi le sao o Samoa i faai’uga fai mo le lelei o Samoa, a o galulue faatasi ai ma atunuu o le Pasefika e tali atu i suiga ogaoga o le tau.
