Ua folafola e le faigamalo a le Feterale le faitau afe o tupe e fesoasoani ai i tagata ua aafia i lologa o loo aafia ai setete o Niu Sa Uelese, Vitoria ma Tasmania.

O nei fesoasoani tau tupe e agai i tagata ua le mafai ona toe maua a latou tupe e masani ona maua ona o aafiaga mai lologa.

O le peimeni ua faaigoa o le disaster recovery allowance o peimeni o loo mafai ona agavaa ai tagata i totonu o faaitu e 71 o loo aafia ma e mafai ona agavaa ai i le oo atu i le 13 vaiaso, o se faamaoniga lea mai le pule o le Services Australia.

O lea peimeni e agavaa ai soo se tasi o loo aafia i lologa tusa pe o se tagata faigaluega poo se pule o galuega.

E le gata la i lea ae o le a faaopoopo atu lea alauni i luga o le tai afe tala o le a tuuina i tagata matutua ma le tai 400 mo tamaiti i aiga taitasi na aafia e fesoasoani ai i aafiaga o lologa.

Ua folafola foi e le premier o Vitoria, Daniel Andrews le isi fesoasoani faavavave o le emergency relief assistance payments mo i latou ua matuai aafia ai uiga louloua o le tau i totonu o Vitoria lea e aupito i aafia i lologa.