O le asia e le Pelesetene o le Toomaga mo ē Puapuagatia o le maota gasegase i Motootua o loo taofia ai se alii talavou e a’oga i se kolisi maualuga i le taulaga, lea o loo taofia mo togafitiga ona sa osofa’i ma faaoolima iai ni taulele’a, ua aumai ai ma le valaau a le Pelesetene o lea faalapotopotoga le faletua o Siliniu Lina Chang i le atunuu ua tatau ona faamuta nei loa soo se sauāga.
O le alii talavou o loo taofia pea mo togafitiga talu mai le masina o Oketopa o le ta’ita’i ulu poo le Headboy i le Kolisi o Maluafou.
O lona tausaga mulimuli poo se tasi o le vasega faai’uaso a lea kolisi, peita’i o le faaoolima na faia ia te ia ua lē mafai ai ona su’e ana su’ega faai’u o le tausaga ma auai i le faauuga.
Faaalia e le Pelesetene o le Toomaga mo ē Puapuagatia, o le polokalame o le 16 aso e tetee atu ai i sauāga ua avea ai aafiaga o lea atalii talavou e fai ma fe’au tau molimoli i le atunuu i le taofia ai loa o soo se sauāga.
O le tuaa tinā o le tama a’oga o loo taofia mo togafitiga o se tasi o sui mo nuu ma afio’aga i le polokalame a le Toomaga mo le taofia o sauāga.
