I le 25 lenei o tausaga talu ona faavaeina le sosaiete o le gasegase o le kanesa i Samoa, ua faailoa i se pepa o faamatalaga faalauaitele le sologa lelei pea o auaunaga a le sosaiete lenei o loo gafa ma polokalame faalauiloa o loo faamalamalama ai vaega tāua e ao ona silafia e faatatau i le gasegase a o lei oo ina aafia se tasi.
I lana fono faaletausaga na usuia i le aso 16 o le masina nei o Tesema na talia ma faamaonia ai e sui auai le lipoti a le Peresetene sa tauaveina lea tofiga le susuga Lauaki Jason Annandale, faapea ma le tala o le tupe ua mae’a sueina e le ofisa suetusi o le Leota and Niumata Chartered Accounts.
O se fono faaletausaga na tolopo mai talu le tausaga e 2021 o nisi o mafuaaga lē maalofia.
O lea la ua mae’a ma ua faia ai se iugafono e le toe tai tolu tausaga le umi o se nofoaiga a sui o le komiti faatonu, ae o le a tasi le tausaga o le nofoaiga ma toe faia le filifiliga. E leo faailoaina e le sosaiete le mafuaaga o lea iuga fono, ae o le laulau fou ua filifilia ai le afioga Tauiliili Alise Stunnenberg e avea ma Pelesetene, Sui Peresetene o le alii foma’i o Leituala Dr Ben Matalavea, o Amanda Lam ua tulai mai e avea ma Tausioloa poo le teutupe, failautusi o Audrey Brown Pereira, ma sui o le komiti faatonu e aofia ai Sose Annandale, Nela Stephen, ma Pouli Dr Keneti Faulalo.
Ua faaiuina foi lea fono faaletausaga i le autasi o sui o le sosaiete e faaauau pea ona avea le Minisita o le soifua maloloina le afioga Valasi Luapitofanua Toogamaga Tafito Selesele ma faatamā.
O le nofoaga tutotonu o le sosaiete o le kanesa o loo i Motootua i le nofoaga o loo iai le vaega o aoaoga faaiunivesite o le tomai faafoma’i a le Iunivesite Aoao o Samoa.
