O lea ua faailoa e le ta’ita’i o le malo i lenei vaiaso le filifilia ai o Komesina e to’alua o le komisi e pulea tagata faigaluega a le malo, ma ua tofia iai le faletua le afioga Fuimapoao Taliilagi Beth Onesemo ma le tofa Ape Leulumoega Sofara.
O le palota tele faanatinati a le atunuu ia Aukuso o le tausaga ua mavae sa tauva ai Fuimapoao i le nofoa o Lotofaga ae o le tofa Ape i le nofoa o Aana Alofi Numera 2.
O i la’ua uma sa tauva i le pati faaupufai o le Faatuatua i le Atua Samoa ua Tasi.
O le vaiaso nei na faamavae atu ai le komisi e pulea tagata faigaluega a le malo i se tasi o tamalii sa avea ma Komesina le afioga Ulualofaigā Talamaivao Perelini, ae o le tausaga na te’a nei na faamavae ai le isi Komesina le afioga Gatoloaifaana Tili Afamasaga.
O le filifilia o Komesina e to’alua ua toe atoa ai le auvaa o Komesina o le komisi o loo ta’ita’ifono ai le afioga Nonu Lemauga Saleimoa Vaai.
