A o iai Samoa i tulaga o le pepesi ai o le faama’i o le fiva o le ponaivi poo le dengue fever, o lea ua fautuaina e le Minisita o le Va i Fafo a Niu Sila, tagatanuu Niu Sila ina ia mata’ituina lelei o latou saogalemu pe afai o fuafua e faimalaga atu i Samoa.
Fautua le alii minisita, Winston Peters i tagata femalagalaa’i ia mautinoa o loo mautū uma vaega mo le puipuiga o le soifua maloloina.
Ia mautinoa ua faatino auala e malu puipuia ai i latou a o lei malaga, e pei ona iai fetuunaiga i o latou inisiua faalesoifua maloloina aemaise i fuafuaga mo femalagaa’iga.
Ma ia mautinoa ua fetuunai foi itu e vave ona toe oo mai ai i le atunuu pe afai ua tigaina, o le faanatinati ona aumai lea o le ma’i i luga o le ea, poo le medical evacuation by air.
I Samoa o lea ua faasalalauina le feagai ai o le atunuu ma le pepesi o le faama’i o le fiva o ponaivi poo le dengue fever, ma ua silia ma le to’a 250 tagata ua aafia i le faama’i.
Ua faamauina na amata vaaia nisi o nei āuga i le masina o Novema o le tausaga na se’i mavae atu nei.
Ma o lea ua galue malosi le Matagaluega o le Soifua Maloloina e ala i le fanaina o le tele o nofoaga ma faleaoga ma le tele o itu o le atunuu o loo iloga ona toatele ai tagata ua aafia i le faama’i, ina ia faatama’ia le iniseti o le namu lea e feavea’ia le siama o le dengue.
O loo fautuaina pea tagata uma ina ia faatino uma itu tau puipuiga ina ia mautinoa e lē aafia mai le faama’i o le dengue fever.
