O Samoa o se tasi o atunuu ua tulimata’i nei e le komiti a Malo Aufaatasi ona o le mou o tagata ma leiloloa, ae e lē o iai se tapenaga lelei e faatino ai galuega mo le sa’ilia o ia tagata.
Ua faailoa ai i se lipoti le tuuina mai o se fautuaga a lea komiti i le malo o Samoa e tapena se ta’iala mautū e faatino ai su’esu’ega ma faia sa’iliga i tagata e mou ma leiloloa atu ai lava o nisi e lē o maua.
O le aiaiga o loo iai nei e faato’ā sa’ili se tagata ua leiloa pe a tuana’i le 24 itula, o se tasi lea o atugaluga o le komiti a Malo Aufaatasi ona e manino mai ai e lē o lelei tapenaga a Samoa i le sa’ilia o tagata e mou ma leiloloa.
O le vaetamaina o fanau a le atunuu o se isi lea o atugaluga o lea komiti ona o loo iai lape ma faaletonu o loo aafia ai le faagaioia o lea tulaga, ona e iai fanau e vaetama ma mou atu ai lava ua leiloa poo fea o faamautū ai.
Tasi lea o fautuaga mo Samoa ia lelei ona faia tapenaga mo vaetama ma ia faatulaga lelei le vaega e maua ai faamatalaga i le lesitalaina o pepe fou e fananau.
