O Setema o le tausaga na tea nei 2023 o loo gata mai ai le lisi o le tau o oloa manaomia ua faatulaga e le Matagaluega o Pisinisi, Alamanuia ma Leipa o latou tau, e faatau atu ai ia oloa i le atunuu.
O oloa ia e pei o taumafa tuuaisa o le vaemoa, ma oloa e pei o aniani ma suka.
Ua faailoa i se faasalalauga mai le Matagaluega o Pisinisi, Alamanuia ma Leipa e tatau i faleoloa siiatoa ma pisinisi o loo faatauina taitasi ia oloa, ina ia taofi le soona sii o tau ae faaaogā tau o le lisi o Setema.
Ua silia nei i le 3 vaiaso o faaitiitia le tulaga maua o nisi o oloa e pei o pusamoa, aniani ma le suka enaena ma o le mafuaaga, o le tuai taunuu o vaa la’uoloa mai fafo.
“E lē o se tiute o se Malo le okaina o oloa mai fafo, ae o le matafaioi lena a pisinisi o loo faatauina mai fafo oloa ma faaulufale i le atunuu”.
O se finagalo lea o le Minisita o Tupe le afioga Lautimuia Afoa Uelese Vaai, i le polokalame o le Soalaupule a le EFKS TV, e faamalamalama ai le fesili pe aisea e tuai ai vaa la’uoloa ma mafua ai ona sioki pe faaitiitia oloa i le atunuu, aemaise lava oloa tau taumafa e manaomia e tagata i aso uma.
Faaalia e le Minisita na te faafetaia le kamupani a Ah Liki i le faailoa i le atunuu o le mafuaaga o le faaitiitia o nisi o ana oloa tau taumafa ona o le tuai o le vaa la’uoloa.
“Faafetai lava i le kamupani lenei, auā o i e iloa ai le pisinisi e mulimulitaia ala malamalama o le ta’u i tagata poo le ā le mea ua faaletonu i se auaunaga”.
O le vaiaso mulimuli lenei o le masina o Fepuari ua fuafua e taunuu ai le vaa la’uoloa a le kamupani a Ah Liki, ma ua faamoemoe o le a toe maua ma faateleina ai nisi o oloa tau taumafa ua faaitiitia.
Ua lipotia le maualuga o le tau o le kilo o le vaemoa i nisi o faleoloa ona o le faaitiitia o lea taumafa i Samoa.
