Ua taoto nei se fautuaga mai le faamasinoga o faigāpalota a le atunuu o le a tuuina atu i le Fofoga Fetalai o le Palemene, ia faamavae le tagata o loo umia le tofi ta’ita’ifono a o le’i faailoaina lautele se faasalalauga o le faia o se palota e sa’ilia ai tofi o le Palemene.
O tagata faigaluega uma foi o se Fono Faavae e fia avea ma sui tauva i se faigāpalota e tatau ona faamavae.
Ua fautuaina ai foi e le faamasinoga le faia o se teuteuga i le Vaega 12 o le tulafono o faigāpalota e faamautū ai lana fautuaga.
O le Aso Faraile ua mavae na aumai ai le faai’uga o le tagi tau palota mai le itumalo o Faasaleleaga 2, lea na faaulu e lē sa avea ma faipule o le itumalo le afioga Magele Sekati Fiaui ma sa tuua’ia ai le sui tauva na manumālō i le nofoa o Faasaleleaga 2 i le palota ia Aokuso i moliaga o faiga faaālatua le tofa Vaaelua Senetenari Samau.
O le faai’uga a le faamasinoga ua faamaonia ai tuua’iga a le sui faipule sa molia e lē sa tauaveina le tofi o le itumalo.
Ae o moliaga a lē na tagi ua lē faamaonia, ma faatumau ai le nofoa o Faasaleleaga 2 ua se’ei ai le tofa Vaaelua Senetenari Samau.
O moliaga o faiga faaālatua ua faamaonia faasaga i le afioga Magele Sekati Fiaui na faauluina le tagi, o lona sainia o le siaki tupe mai tupe o le Fono Faavae ma tuuina atu i le pitonuu o Vaisaulu mo se latou galuega i le faamoemoe e faatosina e palota mo ia, o le isi siakitupe e 10 afe tālā na tuuina atu i se mafutaga a tinā ma tama’ita’i o le itumalo i le faaamoemoe lava e faatosina ai le latou palota, o le siaki tupe e 5 afe 803 tālā na tuuina atu i se feiloa’iga na faia i le falea’oga tulagalua a le afio’aga o Iva i le faamoemoe lava lea e tasi o le faatosina, ma le siakitupe e 2 afe 500 tālā na tuuina atu i se tagata palota o lona suafa o Latu Tofia ma le faamoemoe e faatosina ai lana palota faapea lea lagolago atu a nisi o lana aufaigaluega.
O ia tupe na tuuina atu i le aso na faagasolo ai le palota muamua poo le pre-polling ma le Aso Tofi na sosoo ma le Aso Faraile na faia ai le faigā filifiliga aoao a le atunuu i lana palota tele ia Aokuso o le tausaga nei.
E lua isi moliaga o faiga faaālatua ua faamaonia foi faasaga i lē sa avea ma faipule o lea itumalo.
O ia moliaga e aofia ai le tuuina o ni tupe e ta’i 50 tālā i nisi o tagata palota i se fono sa faia i le falea’oga tulagalua o le nuu o Iva i le masina o Iulai, ma le moliaga o le tuuina atu o le 30 tālā i se tagata palota lava o le itumalo i se fono sa faia i le maota o lē sa avea ma faipule ma faauluina le tagi.
Ua faamaonia i su’esu’ega a le faamasinoga o le tuuina atu o ia tupe sa faia i le faamoemoe e faatosina ai le palota.
O lea faai’uga a le faamasinoga o faigāpalota ua faatumau ai le tofi o Faasaleleaga 2 i le tofa Vaaelua Senetenari Samau ina ua lē mafai ona faamaonia e lē na tagi i ana molimau sa su’esu’eina e lagolago ai ana tuua’iga o faiga faaālatua faasaga i le faipule.
O le tofa Vaaelua Senetenari Samau o le sui faipule o le patī faaupufai e puipuia aiā tatau a tagata ae o le afioga Magele Sekati Fiaui o le sui sa avea ma faipule o Faasaleleaga 2 i le paea’iga 17 a le Palemene o le sui lagolago o le vaega faaupufai o le Faatuatua i le Atua Samoa ua Tasi.
O se finagalo o le afioga Magele Sekati Fiaui i le mae’a ona lau le faai’uga a le faamasinoga o faigāpalota.
