E silia ma le 500 faleoloa o le supamaketi a Coles o le a faatau a latou oloa e faipaaga ai ma le Uber Eats mo le kilivaina o faatauga i paaga i se auala vave.
Ua faailoa i le 9News i le asō o le faiga faapaaga lea o le a amata muamua i le 40 faleoloa a Coles i Melepone ona faasolo ane ai lea i isi vaega uma o Ausetalia i masina o lumanai.
O lona uiga la o paaga poo tagata faatau a Coles o le a mafai ona oka a latou oloa mai ia Coles i luga o le app a le Uber Eats ma faatalitali mai le taunuu atu o le oka i lona fale i totonu o le itula.
E toatele ua fiafia i lenei faiga ma talitali le taimi e amata faaaoga ai i o latou faaitu.
