I le tele o tausaga o faamanatu e le atunuu lona Tutoatasi poo le aso fanau e faamanatu ai le maua o le tatou Malo tuma’oti i le tuanai o pulega faakolone, o lea ua iai nei se finagalo o le Malo e faia ni suiga i polokalame o lea aso faailogaina o le atunuu atoa.
Ua faailoa i se feiloaiga a tusitala ma sui o le komiti o le tutoatasi, e amata atu i le faamanatuina o le 62 tausaga i le masina fou o Iuni, o le a na o le sauniga masani i le malae i Tiafau, o solo faaaloalo ma le sisiina o le fu’a faapea le malelega mai le afioga i le Ao o le Malo, ae o le a leai ni polokalame e pei o faafiafiaga faaleaganuu, ma isi lava polokalame sa masani ai.
O le suiga ua faatulaga nei, o le a tailima tausaga ma faia ni faamanatuaga tetele e pei ona sa sau a’i i tausaga taitasi.
O le faamanatuina o le 60 tausaga o le Tutoatasi o Samoa na pa’ū i le 2022 sa faataunuu ai se faamanatuga tele, ma pe a faitau mai tausaga e lima e tatau ona pa’ū i le tausaga e 2027, e atoa i ai le 65 tausaga o le Tutoatasi o Samoa, ma o le a faia ai polokalame e pei o faafiafiaga e saunia e nuu ma itumalo.
Na ta’ua e sui o le komiti o le Tutoatasi, o lenei suiga o le a faapuupuu ai polokalame i Mulinuu o le a faagasolo i totonu o le fā tausaga, ae o le a lafo atu i tua i itumalo taitasi pe a finagalo iai, o le a faatino ai lava a latou faamanatuga o le Tutoatasi i soo se fiafiaga e mananao ai.
O le Tutoatasi la o le tausaga nei, o le faigalotu i le Aso Sa le aso 2 o Iuni auā o le aso muamua e pa’ū i le Aso Toonai.
O lea sauniga lotu faalemalo e faia i le Malumalu o Maria Imakulata o le Ekalesia Katoliko i Mulivai i Apia.
O le Aso Gafua le aso 3 o Iuni o le sauniga masani i le malae o le faautugatagi i Mulinuu, lea e faatino ai solo faaaloalo a aoga ma faalapotopotoga ma matagaluega foi a le Malo.
O le sisiina o le fu’a ma faapāpā fanafanua e 21, ma le malelega faamanuia mai le Ao o le Malo.
E mae’a ai lava i le taeao sauniga ma toe amata ai galuega i le Aso Lua e sosoo ai.
O le 65 tausaga o le Tutoatasi e faamanatu i le tausaga e 2027 o le a faagasolo ai faafiafiaga uma e pei ona masani ai lea aso faailogaina o le atunuu.
