Ua faailoa e le Privacy Commission i le aufaipisinisi ua tatau ona mataala i lamatiaga o a latou faamaumauga patino i le pisinisi, personal data.
Saunoa ai le sui komesina Liz Macpherson e faapea o le faatumauina ma le teuina malu o faamaumauga o se tasi lea o mataupu tāua i le tele o le mau faaletonu ua alia’e mai e le gata i totonu lava o Niu Sila ae o atunuu i fafo foi i osofaiga i luga o upega tafailagi, cyber-attacks lea na aafia ai le kamupani a le Latitude Finance mulimuli nei.
E silia ma le 300 afe faamaumauga o tagata poo paaga a le kamupani ua aafia ai e le gata i Niu Sila ae o Ausetalia foi.
Fai mai Macpherson ua tatau ona a’oa’oina mai se lesona tāua e le aufaipisinisi mai nei ituaiga osofaiga ma ia aua le toe aoina pe taofimau foi i faamaumauga o tagata ua le o toe manaomia.
Faailoa foi e le komisi lea e ao foi i tagata ona lu’i pisinisi pe aisea latou te manaomia ai ona ao ma teuina o latou faamaumauga pe afai ua faaailoa atu a latou ID e avea ma faamaoniga o o latou tagata.
Fai mai le komisi e tutusa lava le mataupu lea i le puipuia o tulaga faalilolilo ma le tāua o lou soifua maloloina ma le saogalemu.
