A o tālia ai le tuuina mai o le faai’uga tusitusia a le faamasinoga o faigāpalota i le taunuuga o su’esu’ega i moliaga o faatosina solitulafono poo faiga faaālatua sa māfua ai ona faaulu le tagi tau palota mai le itumalo o Falealili 2.
O le Aso Faraile ua mavae na aumai ai le faai’uga o lea tagi ma ua faatumau le tofi faipule o lea itumalo i le afioga Fuimaono Maiava Tito Asafo o loo avea ma minisita o Faato’aga ma Faigāfaiva ina ua lē faamaonia tuua’iga sa faaulu e le afioga Fuimaono Maria Tuatagaloa Meredith o se tinā sa tauva faatuto’atasi i le palota tele mo le nofoa o lea itumalo.
I le lua o moliaga a lē na tagi e le’i faamaonia, ae o moliaga e iva o faiga faaālatua sa molia ai e le faipule lē na tagi, e 6 moliaga ua faamaonia ae lē faamaonia moliaga e tolu.
O le afioga Fuimaono Maiava Tito Asafo o le sui lagolago o le vaega faaupufai o le Faatuatua i le Atua Samoa ua Tasi.
Sa maua se finagalo o se tasi o matai o le itumalo e faailoa ai sona finagalo i le faai’uga o le faamasinoga ona e le’i auai le sui faipule i le lauina o le faai’uga ona o loo malaga i tiute faalemalo.
Le afioga Fuimaono Maiava Viiga Fuimaono.
