Ua faatonuina leoleo e le afioga i le Faamasino o le Faamasinoga Faaitumalo o le pule lea o maliu poo le coroner, ina ia faia se ta’otoga faapitoa e sa’ili ai le māfua’aga tonu o le maliu o le tama’ita’i sa nofo taofia i le vaaiga a leoleo i le falepuipui o Papalii Sia Figiel.
Ua faailoa e le Sui Komesina o Leoleo, Falepuipui ma le Toe Fuata’ina, o le taunuu o le tama’ita’i i le falema’i faaitumalo i Faleolo i le taeao o le Aso Gafua o le vaiaso nei na faamaonia ai ua maliu.
Peita’i sa tuliloa le Sui Komesina i ni fesili mai tusitala, pe na faato’ā faamaonia lea tulaga ina ua taunuu i le falema’i, auā o lipoti na mua’i salalau i luga o upega tafa’ilagi na faailoa ai na maua atu lea tama’ita’i i le sela sa faamautū ai ua maliu.
Ua faailoa ai e le Sui Komesina le susuga Leiataualesa Samuelu Afamasaga, sa na o Papalii Sia lava lona potu ae e sosoo ma potu sa faamautū ai isi tama’ita’i o loo taofia i le vaaiga a leoleo.
O le foma’i faapitoa e faia le ta’otoga o lē ua maliu e lē o mautū i le taimi nei pe sau mai Fiti e pei ona masani ai i ta’otoga e sa’ilia ai māfua’aga o maliu, pe o le a toe sa’ili se foma’i e faia ta’otoga faapitoa poo se pathologist i Niu Sila poo Ausetalia.
E māfua lea tulaga e pei ona faailoa e le sui komesina ona o le foma’i faapitoa mai Fiti lea sa iai le tapenaga e malaga mai e faamautū i Samoa ma galue ai i se totogi e 200 afe tālā i le tausaga, ua toe sui lona mafaufau e mafua i sona mana’o e faaopoopo se isi fuainumera i lona totogi.
