Ua mae’a le su’esu’ega faalotoifale sa sa’ili ai le māfua’aga o le aafia o se tasi o ta’ifau sosogi a le matāgaluega o leoleo, falepuipui ma le toe fuata’ina i ni aafiaga na māfua ai ona ma’i, ma faailoa ai e le Sui Komesina i se tasi o feiloa’iga ma tusitala na masalomia ua overdose le ta’ifau.
O le taunuuga o su’esu’ega e pei ona faailoa e le Sui Komesina le susuga Leiataualesa Samuelu Afamasaga sa faatamala le alii leoleo na vaaia le ta’ifau.
Ua lē toe tuua ai lea malu o le malo i le vaega o feagai ma le vaaia o ta’ifau sosogi e sa’ilia fuālaau faasāina, ae ua faasee atu e galue i le vaega o ta’ifau taaloa.
Ua faasolo manuia le ta’ifau na aafia ma ua amata ona galue faatasi i le vaiaso.
O loo faatali lea vaega o le matāgaluega i ni ta’ifau sosogi mai Niu Sila auā lava le leoina o tuaoi o le atunuu mai le faaulufale faasolitulafono mai o fuālaau faasāina.
