I le tapena ai nei o le ofisa o le komisi o faigāpalota mo le palota laitiiti a le itumalo palota o Safata 1 e pei ona faailoa i le amataga o lenei vaiaso e le Komesina o faigāpalota, o le tasi o galuega o loo tapena iai lea auaunaga a le malo o le faamaopoopo o le lisi o tagata palota ua latou lē usita’ia aiaiga o le tulafono o faigāpalota talu mai le palota tele faanatinati a le atunuu ia Aokuso o le tausaga na te’a nei.
O i latou ia e le’i lesitala ae ua agavaa, ma tagata sa lesitala ae e le’i palota.
Ua faailoa e le Komesina o faigāpalota e leai se itumalo faapalota o sao mai i le lē lesitala ma le lē palota, ae pe ana leai ni palota laiti i le mae’a o le palota tele i le tausaga na te’a nei semanū ua faatino le galuega o le faailoa o tagata ua solia aiaiga ia o le tulafono o faigāpalota ma faailoa iai salatupe e totogi e pei ona aiaia foi i le tulafono o faigāpalota.
E lē o iloa le aofa’iga o tagata sa lesitala ae e le’i palota faapea le aofa’iga o tagata sa agavaa e lesitala e palota i le faigā filifiliga ia Aokuso o le tausaga ua mavae ae e le’i lesitala.
O le faasalaga mamafa o loo aiaia e 2 afe tala i le lē lesitala ae ua agavaa ona avea ma tagata palota.
Se finagalo o le Komesina o faigāpalota, afioga Toleafoa Tuiafelolo Alexander John Stanley i le feiloa’iga ma tusitala i le toe amatalia o galuega a le malo i le Aso Gafua o lenei vaiaso.
