Ua taunuu i Samoa i lenei vaiaso le ta’ita’ifono ma ni sui o le komiti o le Mau o le Sitiseni Samoa, e faatalatalanoa ma lo tatou atunuu le latou tapenaga mo le sailia o ni finagalo ma ni mau e lagolago ai le tulafono taufaaofi mo le toe maua o le sitiseni o tagata Samoa na soifua i le taimi o pulega a Niu Sila.
O loo iai le fuafuaga e oo atu sui o le komiti i le fonotele i Malua i le Aso Lua o lenei vaiaso mo se latou feiloaiga ma le mamalu o usugafono eseese ma o le ta’ita’ifono le afioga Anae Arthur Anae o le a saunoa ai.
O le Aso Lulu o se feiloaiga ma le atunuu lautele i se faatasiga o le a faia i le maota o le Tuutuuileloloto i Apia.
O loo aofia i le aumalaga o sui o le komiti o le Mau o le Sitiseni Samoa le sui ta’ita’ifono le afioga Aupito Toeolesulusulu Tofae Ta’ala Su’a William Sio, o le tasi o sui ta’ita’ifono le faletua afioga Tofilau Nina Kirifi Alai, ma le failautusi o le susuga Seiuli Sāvea Leofo Tone Peseta.
O le a muamua feiloai le aumalaga ma le vasega o tusitala ma le aufaasalalau i Samoa a o lei mafuta atu i le fonotele i Malua.
