A o iai fanau uma a lo tatou atunuu i mālōlōga mo le vaituuaga muamua o le tausaga, o lea ua ave le faatalauula a le Ofisa Sili o le pulega o le matāgaluega o a’oga ma aganuu, i ulu a’oga ma faia’oga uma i le atunuu, ua faatagisia ai le lagolago i le soifua mālōlōina i galuega o le puipuiga o le faama’i o le fiva o ponaivi poo le dengue fever, e pei ona toe pesia ai Samoa.

O le vaiaso mulimuli lenei o le tuuaga o le kuata muamua ua talosagaina ai e le Ofisa Sili le afioga A’eau Chris Hazelman, pulega o a’oga uma e lē gata i a’oga a le malo, ae o a’oga a ekalesia ma a’oga tuma’oti e faaaogā e faia ai ni galuega e faamamā ai lotoā ma falea’oga, e ala i le aveesea uma o soo se otaota faapea lapisi e to’a ai le vai ma avea ai ma nofoaga e nonofo ma tuufua ai iniseti o le namu, o loo feavea’ia le vairusi o le fiva o ponaivi.

E pei ona silafia ua faailoa e le matāgaluega o le soifua mālōlōina le fano o le ola o se tamaitiiti 12 tausaga le matua e mafua i āuga ma aafiaga mai lea faama’i. 

Le afioga A’eau Chris Hazelman o le Ofisa Sili o le matāgaluega o a’oga ma aganuu.

O Tahiti, Fiti, Tonga, ma Samoa o atunuu ia o le Pasefika ua faamaonia le pepesi ai i le taimi nei o le fiva o ponaivi.