I le 33 tausaga o galue le susuga i le faife’au o Pastor Joe Amosa i le ekalesia Faapotopotoga a le Atua poo le A.O.G. i le afio’aga o Iva i Savaii, o le Aso Tofi o lenei vaiaso na tatala ai le feagaiga i le mafutaga māfanafana a le susuga i le faife’au ma le lafu mamoe, ona o se mana’o o le faife’au sa lē faigofie i lana aulotu ona talia e pei ona faailoa e se sui o le ekalesia i lana lauga i le taimi o faaaloaloga.
O le susuga Joe Amosa ua silafia e le to’atele i ana polokalame faaleagaga i auala o faasalalauga eseese, aemaise o lana polokalame ua faaigoaina o le Areto o le Ola.
I luga o upega tafa’ilagi o loo faailoa ai lagona faanoanoa o nisi o lana ekalesia ona o se ta’ita’i faalelotu ua telē lona sao i le olaga o tupulaga ma tagata tapua’i o le ekalesia aemaise o le nuu.
Ua salalau atu foi nisi o tamafanau a le ekalesia i Iva ma galulue i atunuu i fafo ae sa faafailele mai o latou olaga faaleagaga e le susuga Joe Amosa ma lona faletua.
O le fofoga o le ekalesia Faapotopotoga a le Atua i Iva le tofa Sae Soatama Tui i le taimi o faaaloaloga i le tatalaina o le feagaiga.
Sa avea Joe Amosa ma ta’ita’i o le ekalesia Faapotopotoga a le Atua i Samoa i ni tausaga ua tuana’i.
Tautai a’e lau susuga i le faife’au mālōlō manumālō.
