Ua talia e le Faamasinoga Maualuga le talosaga a le sui faipule o Falealili 1 le afioga Toelupe Maoiautele Poumulinuku Onesemo, le faapafala i se tulaga lē tumau o le malosi’aga faaletulafono o le faai’uga ua mae’a fofogaina ua faalēaogā ma soloia ai le nofoa ma le tofi faipule o lea itumalo.
Ua faia lea faai’uga e pei ona faailoa mai e le Faamasinoga Maualuga ae tagofia i se su’esu’ega le tasi o talosaga mai le sui faipule ia faia se iloiloga faaletulafono i aiā tatau o lē ua talosaga e faasino i le faai’uga na fofogaina i le aso 30 o le masina o Mati.
Ua faailoa ai e le afioga i le Faamasino Sili le afioga Satiu Simativa Perese le poloa’iga e tuuina atu le talosaga e tagofia ma su’esu’eina e le afioga i le faamasino mai fafo o Rhys Harrison.
E lē o faailoaina mai le aso e su’esu’eina ai lea talosaga ae o le a iai se isi poloa’iga e faia e le faamasinoga pe a mae’a su’esu’eina le talosaga ma taunuu i se faai’uga.
O le vaiaso nei na faailoa ai e le sui faipule o Falealili 1 lona faamavae mai ona tofiga o le Kapeneta ae tālia se finagalo o le faamasinoga i lana talosaga.
