A o faagasolo ai galuega o le puipuiga o Samoa mai le pepesi o le vairusi o le fiva o ponaivi ma tapunia foi a’oga uma i lenei vaiaso, ua faailoa i ni lipoti lata mai le fano o le ola o se isi tamaitiiti e 5 tausaga le matua ona o āuga o lea faama’i.
Ua faamauina ai nei ua to’atolu fanau ua fano ola i le dengue fever poo le fiva o ponaivi talu mai Ianuari o le tausaga nei.
Ua faamaonia e le foma’i o loo faauluulu i le falema’i o tamaiti i le maota gasegase i Motootua i se lipoti a le TV1 le fano o le ola o lea tamaitiiti mai le faama’i o loo pesia ai Samoa i le taimi nei.
Ua faailoa foi e le foma’i o loo vaaia lea vaega o le auaunaga i le maota gasegase o Tupua Tamasese Meaole, le tofa Ulugia Dr Tito Kamu i auala o faasalalauga a le malo i le leitio ma le televise, ua molimauina le pa’ū o le numela o gasegase e auina atu i Motootua i le 30.
O le amataga o le vaiaso na tatala ai mo le 24 itula le vaega o gasegase tau sāvali i lea maota gasegase.
E faamuta le vaaia o gasegase masani i le 6 i le afiafi ae tatala ai mo gasegase o le fiva o ponaivi mai lea taimi e oo i le valu i le taeao o le aso e sosoo ai.
