Faato’a aumai i tua le ripoti o le numera o tagata ua aafia soifua i luga o le auala i le amataga o lenei vaiaso mo le vaitau o aso fiafia o le Kerisimasi, na faailo ai le tulaga fiafia o iai i le na o le tasi se soifua ua maumau.
Ae peitai ua liua nei le fiafia i le faanoanoa ina ua māua faamatalaga i le taeao nei o le Aso Lulu, i le maliu ai o se isi tagata i se faalavelave na lavea ai se taavale i le magafā i faaitu o Orini Road ma McConnell Road i Orini i le ‘afa tonu o le itula e 12 i le vaveao.
Faamauina le agai atu o sui o faalavelave tutupu faafuasei e tali i lenei faalavelave mata’utia.
Mai i ripoti a le NZ Herald, na ta’ua ai e leoleo e taunuu atu i le nofoaga na tulai ai le faalavelave, ua maliu le ave taavale.
Ma o lea ua oo atu ai le numera o ē ua maliliu i le piriota lenei o aso fiafia i le toafā o le tasi o ia maliu e pei ona lipotia atu na tulai mai i Napier, a o le isi o faalavelave na alia’e mai i State Highway 2 i Tangoio, Hawke’s Bay.
Ta’ua na tapunia uma auala agai atu i le va o Rutherford Road ma Tenfoot Road ao taumafai le vaega o faalavelave mata’utia i luga o auala le Serious Crash Unit e faatino a latou iloiloga.
Māua e lē o mailoa lelei le mafuaga o lea faalavelave.
E pei ona faailo i ripoti ua tuanai, o le aso 24 o Tesema e amata ai le piriota o aso fiafia i le faatulagaga o galuega faatino a sui o faalavelave tutupu faafuasei, mai i le itula e 4 i le afiafi ma e faapau mai i le aso 5 o Ianuari o le tausaga fou, 2026 i le itula e 6 i le taeao; a o lea ua iai i latou ua aafia soifua ma ola i luga o auala tele.
O lea ua oo atu ai le numera o ē ua maliliu i luga o auala i le 270 mo le tausaga lava lenei 2025 mo Niu Sila.
Puna o Faamatalaga: https://www.nzherald.co.nz/nz/christmas-holiday-road-toll-rises-to-three-after-driver-killed-in-waikato/HLWCNSUNW5D6PP3WQVLFBNVDCM/
