Ua amata lelei le taamilosaga a le Black Ferns mo le 2023 ina ua malo i lana uluai taaloga na fetaui ai ma Ausetalia i Brisbane.
O le uluai taaloga lea a le ‘au i lalo o le taitaiga a le faiaoga fou o Allan Bunting aemaise le mae’a mai o le malo i le Ipu o le Lalolagi talu ai.
E lei mafai lava e le Wallaroos a Ausetalia ona faatoilalo le Black Ferns ma o le tamaitai o Tanya Kalounivale na muai sikoa mo le Ferns ae o le tamaitai talavou o Sylvia Brunt na mauaina le sikoa lona lua ma le tolu, sikoa lona fā i le uigi o Mererangi Paul o lana uluai taaloga foi lea i le ‘au.
Toe maua le isi sikoa lona lua a Mererangi i le ‘afa lona lua ma Chelsea Bremner na mauaina le sikoa lona ono a le ‘au.
O le tamaitai o Sylvia 19 tausaga o ia e aupito i laititi i le ‘au ma sa ia mauaina foi le teine taalo o le taaloga ma o se alo foi o Samoa.
O le isi taaloga e sosoo ai a le Ferns e fetaui ai ma Kanata i le aso 9 o le masina fou o Iulai.
O ‘ai o le taaloga Black Ferns e 50, Wallaroos e leai.
