Ua talia e le malo e ala i se faai’uga a le Kapeneta le faamavaega mai le tofiga o le Pule Faatonu poo le Regulator le afioga Lematua Gisa Fuata’i Purcell ae e le’i mae’a le 3 tausaga o lana konekarate i lana nofoa’iga lona lua i le tofiga Pule Faatonu lea sa toe filifilia iai e le malo i le tausaga e 2024.
O aafiaga i gasegase o le tino le māfua’aga o le faamavae o le afioga Lematua Gisa Fuata’i Purcell e pei ona faailoa lautele e le afioga i le Palemia i le fono masani ma le vasega o tusitala i le Aso Tofi ua mavae.
Ae i faai’uga lava a le Kapeneta na faamautū i lana fono i le Aso Lulu ua mavae, ua toe filifilia ai le susuga Tupa’i Peter Peilua e faaauau mo le isi 3 tausaga lona tofiga o le Ofisa Sili o le pulega o faailoga ma tusipasi le Samoa Qualification Authority.
O lea tamalii sa ulua’i filifilia e avea ma Ofisa Sili o lea pulega a le malo i le tausaga e 2023 ma sa galue i Niu Sila i le vaega lava o tusipasi ma faailoga a o le’i galue i Samoa.
