I le silia ma le tolu tausaga o avea ma se tasi o Komesina o le Komisi e pulea tagata faigaluega a le malo le afioga Ulualofaiga Talamaivao Fonoti Perelini, o le toe a’e o galuega uma a le malo mo lenei tausaga fou ua faamuta ai ma le auaunaga a lea tamālii i le komisi.
Ua faailoa i le upega tafa’ilagi a lea auaunaga a le malo le faamavae atu o le ta’ita’ifono ma le komisi i lea komesina ma le agaga faafetai i le maualuga o lana tautua sa faatino ua ausia ai nisi o tulaga lelei i le faatinoga o galuega a le komisi e pulea tagata faigaluega a le malo o Samoa.
Ua faailoa ai e le ta’ita’ifono o le komisi le afioga Nonu Lemauga Saleimoa Vaai le sao o lea tamālii i le toe fausia o nisi o matāti’a ua ausia e le komisi mo le siitia o le auaunaga a le malo mo le atunuu lautele.
O nisi o taumafaiga sa lotolotoi ai le afioga Ulualofaiga Talamaivao Fonoti Perelini o le toe faatulagaina o totogi o foma’i, ma le faalauiloa o le Talofa ma le laufofoga fiafia poo le Talofa with a smile campaign.
Faaalia e le ta’ita’ifono i le upega tafa’ilagi a le Komisi o tagata faigaluega a le malo o le maualuga o le sao o lea tamālii faatasi ai ma se tasi o komesina ua tuua le komisi le afioga Gatoloaifaana Tili Afamasaga, o le a olaola ma manatua pea e le komisi.
