Ua faamauina e le malo nisi o atugaluga ua faaleo i le palemene mai sui faipule ina ua talanoaina le lipoti mo le atinae o tagata tafafao, lea ua lilifa ai le lagolago i le fautuaga mai lea lipoti ina ia toe aumai se vaalele tele mo malaga i le va o Samoa ma Niusila ma Ausetalia.

Peitai na faailoa e le Minisita o loo iai le vaaia o le kamupani vaalele a le atunuu e taua le silasila muamua o le Palemene i lipoti o tala o le tupe i le faagaioia o le kamupani vaalele o le Samoa Airways.

Ua faailoa ai e le minisita o le kamupani vaalele le tōfā Leatinuu Wayne Sooialo, ua maea ona tapena lipoti o tupe a le kamupani vaalele mo le tausaga 2020, 2021 ma le 2022, ma e le o toe mamao ae faataatia i le laulau a fono a le palemene mo le talanoaina.

I le saunoaga tali a le Taitai o le Malo le afioga i le Palemia, Fiame Naomi Mataafa, na faaopoopo ai i tali a le taitaifono o le komiti faapalemene na iloiloina le lipoti mo le atinae o tagata tafafao na faaalia ai e le Palemia, e le malaga uma i vaalele o  tatou tagata, ae o le itu mautinoa, o tagata uma e manaomia le itu i aoaoga, ma o le fua lea a le malo o loo silasila ai i le toe aumai o se vaalele tele.

Ua iai le talitonuga o lipoti tau tupe mo tausaga e tolu mai le 2020 ile 2021, le tausaga 2022 ma le 2023 o le a manino ai sui usufono o itumalo palota i le tulaga o loo iai le faagaioia o le kamupani vaalele.

Ua faailoa e le Palemia o fautuaga i le tatau ona toe silasila le malo i le taugata ua iai pasese i vaalele a le Samoa Airways i le malaga mo Amerika Samoa, faapea le toe faia o malaga i le va o Upolu ma Savaii e vaalele laiti o le Samoa Airways, o le a toe silasila iai le malo.