O le fesili ua iai nei I le mafaufau o le toatele, ina ua salalau mai tala I community cases e toalua lea ua faamaonia, aemaise o le aso ananafi na tusi ai le vaega o le soifua maloloina I matua ma faiaoga o le kolisi o Rangitoto I le North Shore o le isi community case e iai lona sootaga ma se tasi o fanau aoga o le kolisi
Ma I le sauni ai o NZ I le long weekend a loma nei poo le Labour Day, ua faamanatu mai le faatonusili o le soifua maloloina Dr Ashley Bloomfield, faamolemole tautuana e aua le faatamala ona o lea lava e lei iloga lelei ona mou atu le Koviti.
Aumai ai foi ma le faamalosi e faaaoga tali fofoga poo masks pe a iai I nofoaga faitele, e ui e le o faamalosia le faaaogaina o tali fofoga I tuutuuga o iai nei, ma afai o e gasegase, nofo lelei I le fale
O le aso ananafi na faailoa mai ai foi e Bloomfield e lua isi cases mai atunuu I fafo ua faamaonia ma e talitonu o le a alualu pea I luga lea fuainumera
E ono suia le maualuga o tapu mo tagata NZ pe a faamaonia nisi community cases e leai se sootaga ma cases e lua ua faailoa mai, ae mo le taimi nei ua faamautinoa mai e le sui sinia o le vaega a le Labour, Grant Robertson e le o suia aiaiga o tapu mo le puipuia o le atunuu.
