O le faailoa ai e le afioga i le Palemia i le feiloa’iga ma tusitala i le Aso Lulu o suafa o ta’ita’ifono o komiti a Fono Faavae a itumalo faapalota e 51 ina ua faamautū le filifiliga o ia tofiga, ua faamaonia ai e to’aiva faipule o le Itu Agai ua lē filifilia e aofia ai le ta’ita’i o le faipule o Lepa ma le sui ta’ita’i o le Itu Agai ma le vaega faaupufai e puipuia aiā tatau a tagata o le sui faipule o Anoamaa 2.
E faapena foi i nisi o sui faipule o lea patī faaupufai e pei o le faipule o Faleata 3, faipule o Faleata 1, Sagaga 1, Sagaga 4, Falelatai ma Samatau, Faasaleleaga 2, ma Falealupo.
Ua na o le to’alima faipule o le Itu Agai ua filifilia e aofia ai le faipule o Vaimauga 2, Vaimauga 3, Vaimauga 4, Safata 2, ma Faasaleleaga 3.
O le ta’ita’i o le patī faaupufai o le Samoa ua Potopoto ma ona sui faipule e to’alua o loo filifilia faapea faipule tuto’atasi o Siumu, Vaa o Fonoti, ma Vaisigano 2.
Faaalia e le Palemia susuga Laaulialemalietoa Leuatea Poalataivao Fosi e 11 komiti o Fono Faavae e ta’ilua ta’ita’ifono ae o le 40 o Fono Faavae e ta’itasi ta’ita’ifono o a latou komiti.
O le vaiaso faai’u o le masina nei ua fuafua e fono ai ta’ita’ifono ma komiti uma o Fono Faavae i Upolu ma Savaii e faataoto ai le ta’iala e lima ta’ita’iina ai galuega o lenei tausaga.
