E 78 tausaga o se tamā na fano lona soifua i se faalavelave tau taavale na tupu i le auala i Vaimea i le masina o Iuni o le tausaga e 2021.
O Aperila o le tausaga nei na faamaonia ai le moliaga o le ave taavale faatamala na maliu ai se tagata mai lea faalavelave, ma molia ai e leoleo Siomia Junior Savaiinaea, o se faiaoga i le matātā o le inisinia o afi o taavale i le aoga o matātā eseese o le Puna’oa Technical College.
O le faai’uga o le masina na te’a nei o Iuni na aumai ai le faasalaga a le afioga i le Faamasino Sili sa ia suesueina molimau a leoleo ma le molimau a lē ua molia, auā sa tetee Siomia i moliaga a leoleo.
O le faasalaga na amata i se fua e 24 masina poo le lua tausaga i le falepuipui, ae na aveese masina e 6 ona o le faato’ā tulai lea o lē ua molia i le faamasinoga i se solitulafono, na faapena foi ona toesea le 8 masina ona o le ifoga na faatino i le aiga o lē ua maliu faapea ma faaaloaloga na faia, na ave ai ie tetele e 12 ma se tinoitupe e silia i le 21 afe tala.
Na totoe ai masina e sefulu e nofosala ai lē ua molia, peitai i le faai’uga tusitusia o loo faaalia ai e le Faamasino Sili le afioga Satiu Simativa Perese i lana faai’uga, o le faatamala o Siomia na mafua ina ua oso i tua le taavale ma taia ai lē ua maliu sa savali i autafa o le auala i luga o le mutia ae o lea faatamala na tupu ina ua ia lē mafai ona faatonutonu le aveina o lana taavale.
Ua lē o se faatamala i le tagofia o le avamalosi, poo nakoti poo se isi gaioiga na ia faia a o ave le taavale.
O le folasaga a le uso o lē ua molia i le faamasinoga i le aso na faia ai folasaga e fua iai se faasalaga, ua faaalia e le Faamasino Sili o se folasaga na ta’utino ai e le uso le faatamala o lona uso na molia, ma o se faalavelave ua motusia ai le mafutaga a lē ua maliu ma lona aiga i lona toalua ma le fanau.
O lea folasaga ua faamatalaina e le Faamasino Sili o se ta’utinoga e lē gata ua faailoa ai le loto salamō moni o lē ua molia, ae o lona aiga i le tiga alofa i aafiaga o le aiga o lē ua maliu, aemaise o le fano o se soifua ona o se gaioiga e mafua i le faatamala.
Sa maua foi le avanoa o se tasi o le aiga o lē ua maliu na faia ai se folasaga i le faamasinoga ma faailoa ai, ua latou talia le ifoga ma faaaloaloga na faatino.
O le latou lagona foi e lē tatau ona tuuina atu i le falepuipui lē ua molia.
O le mau foi a le tina, le toalua o lē ua fano le soifua sa tuuina atu i le faamasinoga, ua ia faamagalo ma e leai sona manatu e faia se faasalaga faafalepuipui.
Faaalia i le faai’uga tusitusia, e 50 tausaga le umi o le mafutaga a le tina ma lona toalua ua maliu, e pei ona faamatalaina o se tagata sa faamoemoe iai le tausiga o lona aiga.
O le taunuuga o le iloiloga mo se faai’uga o lenei mataupu tau faamasinoga ua manatu le Faamasino Sili o le a nofo vaavaaia mo le 2 tausaga Siomia ma ia faia ni galuega lelei mo tagata lautele e tuli ai le 200 itula e aunoa ma se totogi.
