Ua faamautū nei i se faai’uga a le Kapeneta le tauaveina ai e le tama’ita’i loia le afioga Mauga Precious Chang o le tofiga Loia Sili a le Malo e pei ona faailoa e le afioga i le Palemia i le feiloa’iga ma tusitala i le Aso Tofi o lenei vaiaso.
O se vaiaso e le’i mamao atu na filifilia ai Mauga e avea ma Loia Sili i se tulaga lē tumau peita’i ua faailoa e le Palemia susuga Laaulialemalietoa Leuatea Polataivao Fosi, o le Aso Lulu na faamaonia ai i le fono a le Kapeneta lea tofiga ina ua tuuina atu le fautuaga a le Komisi e pulea tagata faigaluega a le malo.
E to’alua isi sa talosaga i le avanoa peita’i e le’i mae’a ona tuuina atu uma isi pepa o agavaa e mana’omia mo le iloiloga ma faia ai loa le fautuaga a le komisi i le Kapeneta e tofia le afioga Mauga mo le 3 tausaga o lana konekarate.
O le vaiaso fou o le a faatautō ai le Loia Sili ua filifilia ae ua to’afā i le afioga Mauga Precious Chang, tama’ita’i loia o le atunuu ua tusi aao iai le malo e avea ma Loia Sili.
Sa galue muamua o ia i lea ofisa o le malo i ni tausaga ua mavae a o le’i see atu ma avea ma faauluuluga o le ofisa sa tauaveina matāupu tau soligatulafono lea na toe tapunia ma aveesea e le malo.
Sa galue i le la auaunaga tuma’oti o se ofisa loia ma le tama’ita’i loia o Muriel Lui a o le’i filifilia e avea ma Loia Sili.
