O loo suesue nei e leoleo le mafuaaga o le faamanu’alia tigaina o le toatasi ae faamanu’alia isi e mafua mai i le faaoolima i Bader Drive i Magele anapo.
O le tea laititi o le 11 anapo na tali atu ai leoleo ma taavale ambulance ma e lē o tele se faamatalaga mai leoleo poo le ā sa’o le mea na tupu.
Ae i lipoti a le 1News i le taeao nei e faapea o le alii na ia osofaia tagata sa iai i le fale faatalipasi i Bader Drive.
Na saisai mai ai e leoleo le 25 tausaga sa iai i le nofoaga na tupu ai, ma o le asō na tulai i luma o le faamasinoga e tali i moliaga o le faaoomanu’a.
Na tapunia ai ma se vaega o fale faatalipasi i le taulaga faatau i Magele anapo e tusa ma faasilasilaga mai le Auckland Transport ae leai se suiga i faigamalaga a pasi.
O lē na faamanu’alia tigaina na faanatinati atu i le falemai i Aukilani, a o le isi i le falemai i Middlemore.
