Ua faamalosia e le Faamasinoga aiaiga o le tatala ai i tua o lē sa avea ma Minisita o le Kapeneta ae o le Taitaifono o le FAST, o le sui Faipule mai le Itumalo faapalota o Gagaifomauga Numera 3 le Afioga Laaulialemalietoa Leuatea Polataivao Fosi Schmidt.
O le faai’uga a le tamaitai faamasino o le Faamasinoga Faaitumalo ia Talasa Saaga ina ia faamalosia aiaiga e iai le tuuina atu o pepa malaga i le ofisa o le lesitala, ia saini i le ofisa o leoleo i Aso Faraile, faasāina ona talanoa i le mataupu lenei i luga o le social media, ma ia tapu ona ia faafesoota’i molimau a leoleo.
O lea faai’uga na taunuu iai le ulua’i tolaulauga o lenei mataupu i le taeao analeila ina ua tuuina atu ai le talosaga a leoleo mo aiaiga ina ia faamalosia.
E lē gata i lea na talosaga foi le itu a leoleo ina ia tuuina mai se taimi puupuu e le Faamasinoga e faamautū ai moliaga faaopoopo fou a leoleo.
E tusa ma le 16 moliaga o Laauli ua tuufaatasia i seti e lua o moliaga.
O le seti muamua o loo iai moliaga e fā ua mae’a faamautū atu e leoleo, ma o ia moliaga o loo aafia ai ma ē na molia muamua e iai Samuelu Su’a poo Simiko o loo taofia i le vaaiga a leoleo ma lona to’alua o Sivai Kepi, faapea Fepuleai Faimata Su’a, o Li’o Faataumalama ma Lise Schmidt.
O le finauga a le tamaita’i loia a leoleo ia Leinafo Taimalelagi Strickland i aiaiga o le tatala ai i tua o Laauli na ia ta’ua ai, e faapea foi le isi to’alima o loo molia i le mataupu lenei e ese mai ai Samuelu o loo taofia e leoleo, sa teena moliaga peitai o loo tatala i tua ma aiaiga.
Afai o le a lē faamalosia aiaiga i le tatala ai i tua o Laauli sa tatau foi la ona faia ia i latou ia.
Sa ia faailoa foi aafiaga o le faaaogāina ai o le social media e Laauli i le atunuu atoa ai ma le mataupu lenei.
Na faasalavei le tamaita’i loia o tula’i mo Laauli ia Muriel Lui ina ua faaalia e le loia a leoleo le tulaga o aiaiga e mana’omia ai le taofia o pepa malaga o le alii faipule.
Na ta’ua e Lui o le tulaga i le faapea e ono tuua ai e Laauli le atunuu a o faagasolo le mataupu e lē sa’o, ona o ia o se tagata ua iloa i Samoa, o se tagata faipisinisi ma o le ta’ita’i o se Vaega faaupufai tele i totonu o Samoa.
Sa talosaga foi la latou itu i le faamasinoga mo se avanoa e tuua ai e Fepulea’i ma Li’o le atunuu e le’i teena lava e le itu a leoleo.
Na talia e le tamaitai loia le taofia o le talanoa o Laauli i le mataupu lenei i le social media ae leai se tulaga tatau e taofia ai lona sa’olotoga i ana galuega masani e faatino i luga o le auala lea o fesoota’iga, aemaise o lea ua lata le palota.
O Laauli o le ta’ita’i o le Vaega faaupufai e mana’omia lana fesoota’iga e faaaogā ai le auala lea i le social media.
E ui i ia finauga ae sa tuuina mai e le tamaitai faamasino lana faai’uga na ia talia ai aiaiga ina ia faamalosia ma o le a tuuina mai mafua’aga o lona talia ai o le talosaga a leoleo i aiaiga i le Aso Faraile o le vaiaso nei pe a toe tolaulauina le mataupu ma tuuina atu ai moliaga faaopoopo a leoleo lea ua poloa’iina e faamautū atu i lea aso.
Na tuuina atu e le ofisa o le Loia Sili a le Malo le finauina o ia moliaga i le tamaitai loia e galue i se ofisa loia tuto’atasi o Leinafo Taimalelagi Strickland.
