Ua faamalamalama e le afioga ile Fofoga Fetalai susuga Papalii Li’o Oloipola Ta’eu Masipa’u e ala ise pepa o faasalalauga lana fa’ai’uga ua toe fono ai le Komiti o Tulaga Aloa’ia ma Amio Taualoa a le Palemene, e toe autalu ma iloilo le latou su’esu’ega ile mataupu ile sui faipule o Lepa ma Faleata Nu 3, ina ua ma’ea ona lau le faaiuga a le Faamasinoga sili faasino i le lu’I faaletulafono a ia sui faipule na fesiligia ai le faai’uga o le faamalolo le tumau oo la tiute faafaipule seia iai se aso. O le pepa o faasalalauga mai le ofisa o le Fono Aoao Faitulafono e faitauina faapenei :

Mataupu : Toe tauaofia o le Komiti o Tulaga Mamalu ma Amio Taualoa

Ole aso 30 o Aukuso 2022 na tuuina mai ai e le Faamasioga Maualuga lana Faaiuga i le mataupu na ave ai le Fofoga Fetalai ma le Palemene, e sui usufono o Lepa ma Faleata Nu 3 i le Faamasinoga, faatatau i le Faaiuga na faia e le Palemene o Samoa ile aso 24 o Me 2022 e tusa ai o le solia e i la’ua o tulaga aloaia o le Palemene. I le faai’uga, ua talia e le Faamasinoga Maualuga le Faai’uga a le Palemene, i le a’afia ai o’i la’ua ile faalemigao (Contempt) ina ua teena e le Faamasinoga a la’ua mau na tuuina atu i le Faamasinoga (Palakalafa 59, 60 & 68 o le Faai’uga).

O se itu taua le avanoa ua toe tu’uina mai e le Faamasinoga Maualuga , ina ia toe silasila le Komiti a le Palemene ise avanoa moi la’ua ina ia tu’uina mai ai sa la’ua fa’amatalaga, e tusa ai o le fa’asalaga ua tuuina atu e le Palemene. I le faafaigofie, o se avanoa e mafai ai foi e sui Mamalu, ona talosagaina le komiti sei toe silasila ile faasalaga mo la’ua. O le taimi lea, o itu lelei (mitigating factors) mo la’ua, e fesoasoani ai i le komiti mo lo la’ua faasalaga.

O le faamoemoe o le Fofoga Fetalai, ina ia tele ni avanoa mo sui mamalu, e faatalosagaina ai o la’ua fa’asalaga i luma o le komiti. E maua foi o la’ua avanoa, pe a tauaofia le Palemene ile aso 18 o Oketopa 2022. Na faavae le komiti o tulaga aloaia ma amio taualoa (komiti) e su’esu’eina lenei mataupu ise lafo na faamaonia e le Fono Aoao i lana fonotaga ole aso 4 o Me 2022. O se tasi o tu’utu’uga o galuega a le komiti, o le tu’uina atu o se fautuaga talafeagai i le Fono Aoao ile mataupu na tu’uina atu iai.

O le fautuaga a le komiti ile faamaonia ai ua solia e nei sui usufono tulaga aloa’ia o le Palemene, ina ia “ faamalolo le tumau seia iai se aso”, ae peita’i e le’i uia le fa’agasologa e tatau ona oo iai mo se faasalaga talafeagai e pei ona ta’ua e le Fa’amasinoga. Ua maua e le Fa’amasinoga, ua iai se lape tau taualumaga i le faagasologa o galuega a le Komiti, ma le Fono Aoao e faatatau i le fa’asalaga mo ia sui usufono, ua atagia ma manino mai ai e le’i ma’ea le galuega a le komiti.

Ina ia mautinoa ua faamalieina taualumaga tau faasalaga e pei ona iai aia tatau faale Faavae, faatasi ai ma le Faaiuga a le Faamasinoga Maualuga (palakalafa 112), ua ou manatu ai e ao pea ona toe tauaofia le komiti o tulaga aloaia ma amio taualoa na tagofiaina lenei mataupu, e toe asia faasalaga ma faama’ea lelei ana galuega na tuuina atu iai e le Fono Aoao.

Male Faaaloalo lava,
Papalii Li’o Oloipola Ta’eu Masipa’u
FOFOGA FETALAI