O le afiafi nanei lea o le a tatala ai se faaaliga o ata na tusia e se tasi o tusiata mai Italia, Ernesto Coter sa avea ma faiaoga i le aoga tusiata i Leulumoegafou.
O se tasi o tusiata iloga i le atunuu o ia foi sa faavaeina le Manamea Arts Studio i Vaigaga, o Lalovai Peseta na ia saunoa ai e tusa o le faaaliga.
“I le 2021 sa ou faia ai se faaaliga tāua o atalii ma afafine a le Susuga ia Ernesto Coter e faafetaia ai lenei tusiata ia i matou o tusiata sa aotauina i le aoga tusiata i Leulumoega mai le tausaga 1987-2021.”
O lenei faaaliga sa faia lea i le fale tusiata o Peseta ma e toa sefulutasi i latou sa faauuina mai Leulumoega na lagolagoina lona manatu e faia lenei faaaliga.
“Sa faataunuuina lea faamoemoe i lena tausaga, ae te’i ua ou maua se feau tusitusia i luga o upega tafailagi mai se tasi o tamaitai Italia e suafa ia Francesca e faapea na te silafia le tamā ia Ernesto ma o le a alu e faailoa ai la matou faaaliga sa matou aualofa ai mo ia.”
Na ta’ua e Peseta o le aso na sosoo ai na amata ai loa ona toe iai le fesootaiga ma lenei tusiata Italia.
“O le manaoga o si matou faiaoga e fia fesootai ma isi tamafanau sa aotauina i vaitaimi a o iai i le aoga.
“Na ou alu lea rent le taavale ma amata ona ou alu e momoli le feau a le toeaina ma faaaogā foi auala o fesootaiga i upega tafailagi e fesootai ai.”
O le fesootaiga lenei na ia taumafai ai loa e tuufaatasi se faaaliga e faalauiloa ai galuega a Coter ae peitai e ese se manatu o isi.
“E na o le toafā matou lea ua galulue faatasi e faataunuu lenei faaaliga ma o a’u ma le susuga ia Leua Latai lea o loo fesootai pea ma si o matou faiaoga Italia lea ina ia faataunuu ai lenei faamoemoe nanei.”
O le susuga ia Peseta, Lealofi Siaopo Toleafoa, Pelenato Liufau ma Leua Latai o i latou nei sa aotauina e le tusiata ia Coter lea o le a faatinoina lenei faamoemoe.
