O se tasi o manulauti ua leva ona tapena iai le vaega a le Faatuatua i le Atua Samoa ua Tasi a’o loma ai le faigapalota tele i le masina o Aperila o le faaititia lea o tau o nisi o auaunaga a le atunuu e pei o le eletise ma le suavai.
O lea la ua faailoa e le taitai o le Mālō le afioga i le tamaitai Palemia Fiame Naomi Mataafa o le a amatalia i le masina nei le paū o le tau o le eletise i le 20% o se tasi o faamāmā avega ua ofoina e le faigamalo fou o loo iai nei.
O lenei faamāmā avega a le Mālō i lana uluai tala faatatau autu o le tupe talu ona seei mai e taitaia le Mālō lea ua maea ona pasia e le Palemene. O se faaititia i le tau o lea vaega manaomia tele ma o se faamāmā avega mo le
atunuu atoa aemaise o auaunaga ma tautua tau pisinisi o loo faalagolago tele i le eletise mo le faatinoina o a latou galuega.
Taua e le Tamaitai Palemia “O se tasi lenei o manulauti sa tauaveina mai e le vaega faaupufai o le Faatuatua i le Atua Samoa ua Tasi i le faagasologa mai o ana sāvali ao loma a tatou faigapalota, o le faaititia lea o le tau o nisi o auaunaga a le atunuu e pei o le eletise o le suavai ma nisi lava o totogi sa faapenā ona tauave i lalo o auaunaga eseese.”
Taua foi e Fiame “Ma o’u te manatu o le tau o le eletise ma le faamāmā avega i le 20% o se fesoasoani lea mo tatou uma e le gata i aiga ae faapea foi i pisinisi i lenei vaitau ao luitauina pea i tatou ona o aafiaga o le Koviti aemaise le afaina o a tatou pisinisi ma o lea la ua avatu ai le faaiuga a le Kapeneta i le EPC ina ua faatino i le masina lenei le faiga faavae ua faataatia e le Mālō i le faaititia o le tau o le eletise i le 20%”.
