O le galuega o loo faatino i le aveesea o suāuu mai le manuao o le Manawanui o loo goto i se vaega o ogasami i Saute o le motu o Upolu, o le tapu o se vaega tele o le ogasami ona toe uia ma fagotaina ua faaitiitia mai le 56 tesimale 7 sikuea kilomita i le 28 tesimale 8 sikuea kilomita.
Ua mafua lea faaitiitiga ina ua mae’a ona faia se su’ega poo se test o suāsami ma meaola o le gataifale e le nofoaga o su’esu’ega faasaienisi le SROS.
O loo faaauau pea ia su’ega peitai ua faailoa e le matagaluega o galuega tetele a le malo i se faasalalauga, e ui ua faaitiitia le ogasami o loo aafia i le tapu, ae lē o mafai lava ona toe fagotaina lea vaega o le gataifale o le atu Safata.
O le aso 24 o Tesema o le tausaga na te’a nei na faalaua’itele ai mo le silafia e le atunuu le 2 kilomita o le telē o le ogasami o iai le manuao e sā ona uia e ni vaa ma ni tagata e oo i vaalele faapea le aufagogota.
